Якуб Колас – адзін з самых вялікіх пісьменнікаў, якіх калісьці нараджала беларуская зямля; чалавек, пасланы Богам, каб апець прыгажосць роднай краіны, спазнаць і раскрыць для нас загадкавасць быцця, навучыць жыць і кожны дзень здзіўляцца дарам Сусвету. Шмат збіраў ён “скарбаў невядомых з людскіх сардэц і душ, з палёў сваіх і пушч”. Творчасць Песняра складае цэлую эпоху ў гісторыі айчыннай літаратуры, а мастацкая вартасць яго твораў пацвярджаецца на працягу стагоддзя ўсё новымі пакаленнямі чытачоў. Таму юбілей Якуба Коласа – гэта падзея ў жыцці ўсяго народа.
З кожным годам усё большы прамежак часу аддзяляе нас ад перыяду, калі жыў і ствараў свае геніяльныя творы класік, і ўсё больш прыцягальным становіцца вобраз Якуба Коласа не толькі як найвыдатнейшага майстра слова, але і як чалавека, з яго марамі, хваляваннямі, радасцямі і клопатамі.
Дом Коласа яшчэ пры яго жыцці быў тым месцам, дзе панавала творчая і сяброўская атмасфера. І нават сёння кожны, хто ў яго заходзіць, адчувае сябе вельмі ўтульна ў беражліва захаванай прасторы дома-музея.
Нават цяпер тут адчуваецца прысутнасць самога паэта.
Музей цесна супрацоўнічае з сям’ёй Коласа. Тут працуе яго праўнучка Васіліна. Нядаўна выйшла кніга “Табой я жыў, табой жыву”, прысвечаная жонцы Якуба Коласа. А яшчэ прайшла прэзентацыя кнігі з удзелам унучак класіка і яго праўнучкі.
Супрацоўнікі стараюцца, каб дух Коласа адчуваўся і каля ягонага дома. Там вельмі прыгожа, многія прыходзяць на фотасесіі, што таксама спрыяе папулярнасці музея. А каб лепш зразумець дух Коласа, можна паўдзельнічаць у распрацаванай у музеі гульні “Жыццё па Коласе” – не так лёгка выбраць правільныя рашэнні ў той ці іншай жыццёвай сітуацыі, якія прымаў у свой час пясняр. Але ж на тое ён і адзіны, і непаўторны Якуб Колас!
У залах музея падрыхтавана да адкрыцця выстава інскрыптаў. Над экспазіцыяй працавала галоўны захавальнік фондаў музея Васіліна Міцкевіч. Праект “Ад усяго сэрца, шчыра: інскрыпты Якуба Коласа” ажыццяўляўся на працягу ўсяго юбілейнага года, а гэтая выстава – знаёмства з яго вынікамі. Паказаць Коласа і як пісьменніка, і як грамадскага дзеяча, і як чалавека, паказаць асяроддзе можна праз яго аўтографы. Кожная кніга тут памятае Якуба Коласа, цеплыню ягоных рук.
Кожная выяўленая кніга з аўтографам адкрывае невядомыя старонкі жыцця паэта, дазваляе даведацца аб асобах з яго акружэння, раскрывае гісторыю кантактаў, стасункаў і сяброўскіх зносін пісьменніка з рознымі людзьмі.
Якуб Колас вельмі любіў людзей, быў добрым і спагадлівым чалавекам, заўсёды дапамагаў тым, хто сапраўды меў у гэтым патрэбу. Як запавет нам, тым, хто жыве сёння, гучаць словы Класіка: “Я прыйшоў у жыццё не дзеля сябе самога, я прыйшоў дзеля Вас. Калi Вам будзе добра, калi Вы (я тут разумею ўвесь комплекс жыцця) пойдзеце па праўдзiвай дарозе жыцця, калi Вы будзеце мець на ўвазе не толькi сябе, але i народ, якi Вас пусцiў у жыццё, i калi Вы будзеце жыць народам дзеля народа, тады я скажу: «Няхай жа будзе шчаслiва Ваша дарога»”.
Чытайце Коласа, абгрунтоўвайце прачытанае, дзяліцеся ўражаннямі і па магчымасці наведвайце мясціны, якія звязаны з жыццём і працай нашага славутага Песняра!
ФОТА